Thursday, 5 September 2013

ജനനായകന്‍ വെള്ളിത്തിരയില്‍!!

തിരുവനന്തപുരം: രാഷ്ട്രീയ നേതാവെന്ന നിലയില്‍ നിരവധി അനുയായികളുള്ള വിഎസ് ഇതാ അഭിനയത്തിലൂടെയും ആരാധകരെ സൃഷ്ടിക്കുന്നു. പ്രതിപക്ഷ നേതാവ് വിഎസ് അച്യുതാനന്ദന്‍ അഭിനയിക്കുന്ന ആദ്യ സിനിമയുടെ ഷൂട്ടിങ് തിരുവനന്തപുരത്ത് ആരംഭിച്ചു. സെയ്ദ് ഉസ്മാന്‍ സംവിധാനം ചെയ്യുന്ന 'അറ്റ് വണ്‍സ്' എന്ന ചിത്രത്തില്‍ പൊതുജനങ്ങള്‍ക്ക് ഒരു സന്ദേശം നല്‍കുന്ന രംഗത്താണ് വി.എസ്. അച്യുതാനന്ദന്‍ പ്രത്യക്ഷപ്പെടുന്നത്. ജനങ്ങളെ വേട്ടയാടുന്ന ചില സാമൂഹികവിപത്തുകള്‍ക്കെതിരേയാണ് വി.എസിന്റെ സന്ദേശം. കന്റോണ്‍മെന്റ് ഹൗസില്‍ വി.എസ്. പങ്കെടുക്കുന്ന രംഗം കഴിഞ്ഞ ദിവസം സംവിധായകന്‍ സെയ്ദ് ഉസ്മാന്‍ ചിത്രീകരിച്ചു. പ്രതിപക്ഷ നേതാവായി തീപ്പൊരി പ്രസംഗം നടത്തുന്ന വി.എസ്. വെള്ളിത്തിരയിലും നല്ല പ്രകടനമാണ് നടത്തിയതെന്നും ആദ്യ ടേക്കില്‍ രംഗം ഓക്കെയായെന്നും അണിയറപ്രവര്‍ത്തകര്‍ പറയുന്നു. ആദം അയൂബ് അവതരിപ്പിക്കുന്ന ഡോ. അജ്മലിന്റെ 'അറ്റ് വണ്‍സ്' എന്ന പുസ്തകത്തിന്റെ പ്രകാശനം നടത്തുന്ന രംഗത്തും വി.എസ്. പങ്കെടുത്തിട്ടുണ്ട്. പുസ്തകപ്രകാശനം നിര്‍വഹിച്ച ശേഷം വി.എസ്. പൊതുജനങ്ങളെ അഭിസംബോധന ചെയ്ത് പ്രസംഗിക്കുന്നതാണ് രംഗം. 'മിസ് ലേഖാ തരൂര്‍' എന്ന ചിത്രത്തില്‍ മീരാ ജാസ്മിന്റെ നായകനായി അഭിനയിച്ച ബദ്രിയാണ് 'അറ്റ് വണ്‍സി'ല്‍ നായകന്‍. സിനിമാകമ്പനി, അയാളും ഞാനും തമ്മില്‍, ഒറീസ എന്നീ ചിത്രങ്ങളില്‍ പ്രധാന വേഷത്തിലെത്തിയ ശ്വാസികയാണ് നായിക. റെജി പ്രകാശ്, തലൈവാസല്‍ വിജയ്, ജഗദീഷ്, ബേസില്‍, ഇന്ദ്രന്‍സ് എന്നിവരും പ്രധാന വേഷത്തിലെത്തുന്നു. കൊച്ചു പ്രേമന്‍, ശശി കലിംഗ, പ്രേം ഷാനവാസ്, ടി.എസ് രാജു, ശെന്തില്‍, അസീസ,് ശ്രീകുമാര്‍, ആദം ആയൂബ്, ബി.ആര്‍ ഗോപു, യമുന, മാസ്റ്റര്‍ അഭിജിത്ത്, ബേബി ദിയ എന്നിവരാണ് മറ്റു താരങ്ങള്‍.ആറ്റിങ്ങല്‍ ഫിലിംസിന്റെ ബാനറില്‍ സഫീര്‍, റിയാദ്, കിളിമാന്നൂര്‍ രവീന്ദ്രന്‍ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്.

No comments:

Post a Comment